By
Lali Staff
Pago Pago - AMERIKA SAMOA
CHRISTIAN SIAULAIGA
E tusa ai ma fa’amaumauga a leoleo, o le aoauli o le aso 31 o Mati, na valaau atu ai se tina matua i le Ofisa o Leoleo i Tafuna mo se fesoasoani, ona o se tasi o le fanau, o lo’o faatupu vevesi i totonu o lona aiga, ma palauvale i le tama matua.
Ina ua taunu’u leoleo i le maota o le tina matua, sa faamatalaina e le tina matua le agai atu o lona alo lea sa faatupuina le vevesi, i le umukuka ma tau’ai ni fagu vai i totonu o le pusa aisa. Ma sa le fiafia ai le tama matua o le aiga, ma ona otegiaina le atalii, ae peitai, na ita le alii ma savali agai i lona potu moe ae o lo’o palauvale mai lava.
Sa ta’ua e le tina matua, ua mafua ona ia valaauina leoleo, ona e le o se taimi muamua lea ua tupu ai se faalavelave faapea.
Na lokaina mai loa e leoleo ia le alii 23 tausaga o Christian Siaulaiga ma aveina atu o ia i lo latou ofisa i Tafuna mo le fa’aauauina o a latou galuega.
O le ofisa a leoleo, sa fa’atalanoaina ai e leoleo ia lenei alii talavou ma sa ia ta’ua e faapea, a’o ia taumafai e tu’u ni fagu vai i totonu o le pusa aisa, sa faapea ona ‘e’e atu lona tama matua ia te ia, ma tago ua futi atu lona ulu. Ma o le mafuaaga lea na ia ‘e’e ai i lona tama matua ma palauvale mai iai.
Ua molia nei Siaulaiga i le faitauga e tasi o le Faatupu Vevesi i totonu o lona aiga – o se vaega ‘C’ o solitulafono mama, lea e mafai ona nofosala ai i le falepuipui i le o’o atu i aso e sefululima (15), pe sala tupe e $300; po o fa’asalaga uma e lua.
E $300 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.
HARRY FITIAO
O lo’o ua ta’ua i faamaumauga a leoleo, le o’o atu o se valaau i lo latou ofisa i Fagatogo, i le vaveao o le aso 26 o Mati, a se tina o lo’o mana’omia se fesoasoani, ona o lona to’alua, le susuga ia Harris Fitiao, lea ua molia nei i le tulafono, o lo’o palauvale atu ia te ia ma ua ia se’iina foi le uaea eletise o lo’o fa’aaogaina e lo la aiga.
Sa faapea loa ona agai atu leoleo e tali le valaau a lenei tina, i lona maota i Faga’alu i tafatafa o le malumalu EFKAS. Sa mafai ona talatalanoa le tina ma leoleo ina ua o latou taunu’u, ma na fa’ailoa iai e le tina i leoleo, sa tu’ua e lona to’alua ia lo latou fale, ina ua ia (tina) valaauina le ofisa a leoleo. Ae na mafai e le tina ona faamatalaina i leoleo ia foliga ma la’ei o lo’o la’eiina, e lona toalua.
Sa taumafai leoleo e saili le ua molia, i tafa ala ma maota, ae peitai, sa le’i mauaina o ia. O lea na faatonuina ai le tina e leoleo, ina ia vave logo atu lo latou ofisa pe afai ae toe fo’i mai lona to’alua.
O le 4:39 o le afiafi lava lea, na toe maua ai e le ofisa a leoleo ia seisi telefoni mai i le tina e tasi, ma fa’ailoa atu i sui malu o le malo, o le la ua toe fo’i atu lona to’alua ma o lo’o fai sana malologa i totonu o le latou fale.
Na faapea loa ona agai atu leoleo ma lokaina mai le susuga ia Fitiao.
Ua molia mai o ia i le faitauga e tasi i le moliaga e tasi, o le Faatupu Vevesi i totonu o lona aiga – o se vaega ‘C’ o solitulafono mama, lea e mafai ona nofosala ai se tasi i le to’ese, i le o’o atu i aso e sefululima (15), pe sala tupe e $300; po o faasalaga uma e lua.
Section:
Le Lali
View the discussion thread.
Continue reading...